Zbardhen kodet e trafikimit të drogës: Më sill 10 birra

Bisedat e zbardhura midis bashkëpunëtorëve të Ergys Dashit zbulojnë kodet e trafikimit të kokainës.

“Më sill 10 birra. Porosit 2 copë e gjysëm”,- një pjesë nga bisedat e shkurtra mes bashkëpunëtorëve të Ergys Dashit, i cili u vra pak muaj më parë në Ekuador.

Grupi kriminal akuzohet se trafikonte kokaine e marijuanë nga Amerika e Jugut e nga vendet e ballkanit drejt Italisë, Zvicrës, Gjermanisë, Hollandës e Sllovenisë që drejtohej nga Ergys Dashi.

Në këtë grup janë arrestuar 16 persona në një operacion të kryer në Shqipëri, Itali dhe në Poloni.

Grupi i trafikantëve tregtonte sasi të mëdha droge e cila mbërrinte në Europë e një kapital financiar që garantonte strehimin e korrierëve të drogës e makinat lluksoze për transportimin e saj.

Makinat modifikoheshin në Slloveni, ndërsa banesat merreshin me qira nga persona të tretë, e përdoreshin si për strehimin e korrierëve dhe për magazinimin e lëndës narkotike. Kokaina mbërrinte nga Amerika e Jugut përmes rrugës detare në portet europiane duke përdorur teknikën rip-off.

Hetimet investigative të antidrogës e të antimafias italiane të qytetit të Torinos të shtrira në territorin kombëtar dhe në shtetet Shqipëri, Ekuador, Slloveni,  Polonia, Gjermani, e Zvicër kanë çuar në shkatërrimin e një grupi trafikantësh droge të akuzuar për trafikun e një sasie lëndësh narkotike me vlerë rreth 4.5 milionë euro.

Dashi u ekzekutua më 22 janar 2022 në një restorant të vendosur në Avenue Joaquín José Orrantia, pranë një qendre tregtare në veri të Guayaquil.