Qeveria ka shtuar masat e dëmshpërblimit për familjet ku pjesëtari i tyre ka qenë punonjës i Gardës dhe ka humbur jetën në detyrë. Në vendim thuhet se, çdo familje do të përfitojë 10 paga në total. Vlera totale do të llogaritet në bazë të pagës së muajit të fundit që merrte punonjësi i Gardës. Madje një pagë bonus ata do ta marrin çdo përvjetor vdekjeje. “Pjesëtarët e familjes, që bashkëjetonin me punonjësin e Gardës së Republikës së Shqipërisë në çastin e humbjes së jetës, në krye apo për shkak të detyrës, përfitojnë ndihmë të menjëhershme financiare për çdo person, në masën e një page, referuar pagës mujore të muajit të fundit të shërbimit. Përfitimi i ndihmës së menjëhershme nuk duhet të jetë më shumë se 10 paga në total. Pjesëtarë të familjes, që bashkëjetonin me punonjësin e Gardës së Republikës së Shqipërisë në çastin e humbjes së jetës janë: fëmijët, bashkëshorti/bashkëshortja, prindërit, personat në kujdestari”, thuhet në vendim.
Gjithashtu bëhet me dije se, do të përfitojnë gjithmonë pension suplementar, i cili gjithashtu do të llogaritet në bazë të pagës mujore që merrte i ndjeri. Pra pensioni që do t’i kalojë familjes do të jetë sa 100% i pagës mujore për postin që gëzonte familjari i tyre.
Ndërkohë, të gjithë fëmijët që kanë humbur prindërit e tyre në shërbim të Gardës do përfitojnë libra falas dhe bursë 100%. Ndër të tjera citohet se kur familjet e të ndjerit janë të pastrehë, ministria përgjegjëse duhet të bëjë deklarimin dhe pranë Entit të Banesave që t’u sigurojë menjëherë atyre shtëpi, në bazë të numrit të pjesëtarëve. “Pjesëtarët e familjes, që bashkëjetonin me punonjësin e Gardës së Republikës së Shqipërisë, në çastin e humbjes së jetës në krye apo për shkak të detyrës, përfitojnë pension suplementar familjar, në masën 100 (njëqind) % të pagës mujore të muajit të fundit kalendarik të shërbimit, pavarësisht nga periudha e sigurimit. Përfitimet jepen në vlerën 100 (njëqind) % të pagës, sa herë që paga sipas së cilës është llogaritur ky përfitim ndryshon”, përcakton vendimi.
Ky vendim ngarkon institucionet përgjegjëse që të fillojnë menjëherë me evidentimin e rasteve, plotësimin e dokumentacioneve dhe përcaktimin e vlerës për çdo familje përfituese.
E.H/ gijotina.com/
