Krenar Zeneli u shpall pak ditë më parë boksieri më i mirë i Kampionatit Kombëtar në një finale ku pati edhe incidente. Në një prononcim të dhënë së fundmi ai ka dënuar aktet e dhunës ndërsa ka theksuar se synon medalje në kampionatin botëror që zhvillohet në Beograd.
“E prisja këtë çmim sepse ky ka qenë synimi im që kur u nisa në këtë aktivitet. Isha përgatitur maksimalisht në stërvitje me trajnerin tim duke u stërvitur me 2-3 seanca në ditë.
Në ndeshje decizive dhe të forta këto skena janë të përsëritura në vendin tonë, por ne nuk kishim lidhje me këtë situatë sepse ishte midis dy ekipeve të tjera dhe patjetër që këto skena nuk i kanë hije boksit sepse sporti pasqyron kulturë dhe edukatë
Aktiviteti i radhës është Kampionati Botëror që zhvillohet nga data 25 tetor deri në datën 10 nëntor në Beograd në Serbi dhe patjetër që synimi është të sjellim medalje.
