Zgjedhjet e 11 majit, Rregullatori miraton mënyrën se si do të votojnë emigrantët

Komisioni Rregullator miratoi me vota unanime një prej akteve më të rëndësishme për votimin e shtetasve nga jashtë vendit, atë të mënyrës se votimit.

Çdo votë që vjen nga jashtë do të konsiderohet e vlefshme vetëm në rastet kur fleta e votimit plotësohet saktë, ku kryqi vendoset në kutinë përbri logos së partisë dhe emrit të kandidatit. Ndërkohë fletët e votimit nga jashtë duhet të vijnë pranë ambienteve të KQZ brenda orës 19:00 të datës 11 maj.

Çdo shtetasi shqiptar që i është aprovuar kërkesa nga KQZ për të marrë pjesë në zgjedhjet e 11 majit, do t’i dërgohet me postë zarfi me të gjithë dokumentet zgjedhore brenda, të cilat duhet t’i plotësojë dhe t’i dërgojë sërish pranë Komisionit Qendror të Zgjedhjeve.

I gjithë procesi sipas vendimit të Komisionit Rregullator do të monitorohet nga të gjitha partitë politike.