Ministria e Mbrojtjes ka dhënë përditësimin më të fundit në lidhje me zjarret në vend. Sipas tyre, mbrëmjen e djeshme janë izoluar vatrat në shpatin e malit në kthesën e Balldrenit, në Lezhë. Aktualisht po vijon puna për shuarjen e zjarrit në fshatin Lgjin në Orosh të bashkisë Mirditë, ku flakët po zhvillohen me intensitet të ulët.
Në fshatin Patin, njësia administrative Klos, ku dje ra zjarr në një sipërfaqe me shkurre, ferra dhe pyll dushku është bërë e mundur të shuhet një pjesë e vatrës dhe nuk paraqet rrezik për banesat. Në terren kanë shkuar edhe 20 forca nga shërbimi zjarrfikës dhe shërbimi pyjor për të mundësuar izolimin e plotë gjatë ditës së sotme.
Zjarre ka ende në zonën e “Makaresh”, në zonën e Krastës në Krujë, si dhe në fshatin Bizë në Ishëm të Durrësit, ku po punohet për të shuar vatrat e zjarrit.
Discussion about this post