Zjarri në ishullin e Sazanit dyshohet të ketë qenë i qëllimshëm ndërsa janë siguruar dhe pamjet e para të piromanit që fshihet pas ngjarjes. Në rrjetet sociale qarkullon një video e bërë nga një zjarrfikës, i cili ka siguruar momentin kritik, ku personi ende i paidentifikuar i ka vënë flakën ishullin.
Policia ndërkohë bën të ditur se ka nisur një hetim për të zbuluar autorin apo autorët e kësaj zjarrvënie që mori përmasa të mëdha. Në videon e siguruar, shihet se si personi duket që del nga një vatër e sapondezur zjarri.
Ende nuk dihen shkaqet që e kanë detyruar atë të ndërmarrë një veprim të tillë, por Kodi Penal në fuqi parashikon ndëshkime deri në 20 vite burg për autorët e djegies së qëllimshme të pyjeve dhe bimësisë në Shqipëri.
Konkretisht, neni 206/a i Kodit Penal, ndryshuar për herë të fundit në vitin 2013, parashikon 5 deri në 8 vite burg për shkatërrimin me dashje përmes zjarrit, të fondit pyjor dhe të çdo njësie të ngjashme me të, me pasoja të rënda materiale.
Kur zjarrvënia është kryer me qëllim ndryshimin e kategorisë dhe destinacionit të tokës, nga pyll në kullotë, truall etj., parashikohet një dënim me burg nga 5 deri në 15 vjet. Ndërkaq, kur vënia e zjarrit të qëllimshëm ka shkaktuar pasoja të rënda për pronën, shëndetin ose jetën e njerëzve apo dëme të rënda dhe të zgjatura në kohë ndaj mjedisit, dënohet nga 10 deri në 20 vjet burg.
Discussion about this post