62 vite burg për 7 personat e përdhunimit të 11-vjeçares në Kosovë

Gjykata e Kosovës ka dënuar me 62 vite burg, 7 të akuzuarit për përdhunimin e 11 vjeçares, në Prishtinë në vitin 2022.

Lajmin e ka konfirmuar avokatja e viktimës, Kimete Krasniqi. Sipas saj, një prej të akuzuarve është dënuar me 12 vjet burgim, 6 janë dënuar me nga 10 vjet burgim dhe një është liruar në mungesë të provave.

“Vetëm njëri është liruar në mungesë të provave, ndërsa të tjerët janë dënuar me aktgjykim meritues, njëri prej tyre shpallur fajtor dhe është dënuar me 12 vjet burgim, ndërsa të tjerët janë dënuar me nga 10 vjet burgim”, ka thënë avokatja e Krasniqi për mediat kosovare.

Ndër të tjera Krasniqi ka treguar se viktima gjendet në strehimore, duke thënë se gjëndja e të miturës është jo e kënaqshme.

Lidhur me dënimet ka folur edhe avokati i një prej të dënuarve. Avokati Haxhi Millaku ka thënë se klienti i tij është dënuar me 10 vjet burgim.

 “Klienti im është dënuar me 10 vjet, për një kontakt që e ka pasur 5 minuta, është e tmerrshme, ka qenë kontakt që e ka kontaktuar, edhe ai as ajo nuk e ka njohur as nuk e ka identifikuar, vetëm bisedë dhe asnjëherë nuk e ka identifikuar klientin tim, edhe brenda seancë kemi kërkuar identifikimin edhe brenda seancës, nuk e njeh”, është shprehur Millaku.

Millaku ka akuzuar institucionet e drejtësisë për fabrikim të këtij rasti.

“Kemi të bëjmë me një fabrikim komplet, nga fillimi deri në fund, të një situate inekzistente apo thënë me tepër është simulim i vetë organeve të drejtësisë. Me të vetmin qëllim që ta arsyetojë mediumet se ndodhi kjo dhe një grup i personave kanë pasur kontakt me një fëmijë 11-vjeçar, është skandaloze”, ka deklaruar Millaku.

Ndër të tjera avokati pretendon që viktima është mbi 16 vjeçe.

“Shkenca e mjekësisë, në kuptimin shkencor, radiologjik, dora e majtë, kocka e vërteton që është mbi 16 vjeç. , prandaj është e tmerrshme … Janë normat imperativë që nuk guxon t’i anashkalojë drejtësia, është skandal”, ka theksuar Millaku.

Rikujtojmë që opinion publik u trondit në gusht të 2022, ku një 11 vjeçare u abuzua seksualisht nga disa persona. Rasti u zbulua pasi nëna e të miturës e denoncoi si të humbur. Policia zbuloj së ajo ishte rrëmbyer në park nga disa persona dhe ishte përdhunuar për 7 orë resht. Megjithatë kjo nuk ishte hera e parë që kjo ndodhte, pasi ajo ishte abuzuar për disa muaj me radhë.

Pas ndjekjes së ngjarjes policia vendoi para drejtësisë 8 persona.