Shoqëria Civile ka organizuar një protestë paqësore ditën e sotme para SPAK. Me pankarta në duar, ata kërkojnë të zbardhen disa nga ngjarjet dhe për nxitjen e institucioneve të drejtësisë.
Përpara SPAK, përfaqësues të shoqërisë civile kanë zgjedhur të protestojnë përmes disa mesazheve pikante, duke kërkuar të vënë në lëvizje këtë organ të lartë të drejtësisë.
“Ku është floriri i Kërrabës?”; “Pse u lejua vizita e kryeministrit të Greqisë për të vizituar Himarën?”;
“Përse nuk kërkon kryeministri i Shqipërisë të vizitojë Çamërinë?”; “Kush e pengon votën e diasporës?”;
“Kush ja fali Detin Greqisë?”; “Pse e vranë Kosta Trebickën?”; “Kush e vrau Remzi Hoxhën, e duam trupin”, kanë qenë disa prej pankartave të kësaj proteste të heshtur.
“Objekt i kësaj proteste është nxitja e mbështetja e punës së Institucioneve të drejtësisë e veçanërisht të Strukturës Antikorrupsion, në drejtim të hetimit, zbulimit e ndëshkimit të krimeve, të krerëve më të lartë të politikës e drejtësisë shqiptare, në këto 30 vite demokraci.
Qytetarët shqiptarë kërkojnë me insistim, që ata politikanë që kanë vjedhur e kanë vënë dorë mbi pasurinë e popullit, të hetohen, të çohen në sallën e gjyqit, tu konfiskohet pasuria e të dënohen për fajet që i kanë bërë popullit shqiptar…”, thuhet në njoftimin e Unionit të shoqërisë civile dhe këshillit organizativ të Kuvendit Kombëtar shqiptar.
Discussion about this post