Humbja ndaj Laçit është pa dyshim një nga më të dhimbshmet për Partizanin për faktin e thjeshtë se komprometon shumë garën për titullin. Tashmë Tirana është 5 pikë larg, në një kohë kur kanë mbetur edhe 7 javë kampionat. Por, ndryshe nga çfarë thotë Kolela, se gara për titullin është mbyllur, ka disa arsye për të menduar ndryshe.
E SHKUARA – Partizani ka qenë edhe më shumë se pesë pikë larg Tiranës dhe ka treguar se di të ngushtojë diferencën, si dhe të kalojë situata të tilla. Në fazën e tretë, të kuqtë i rikuperuan bardhebluve katër pikë, teksa këtë herë do të duhet vetëm një më shumë.
NDESHJA DIREKTE – Pas pak javësh luhet derbi, që është pa dyshim një mundësi e madhe për Partizanin që të afrohet me plot tri pikë. Fitorja e derbit, do t’i jepte akoma më shumë moral, si dhe avantazh në ndeshjet direkte ndaj bardhebluve.
SITUATAT E TIRANËS – Ndryshe nga Partizani, Tiranën e pret një kalendar më i vështirë derisa mbërrin në ndeshjen derbi. Kjo i krijon avantazh të kuqve, që shpresojnë në hapa fals të kundërshtarëve që të reduktojnë sa më shumë diferencën. Nga ana tjetër, bardheblutë do të luajnë të gjitha ndeshjet e mbetura jashtë Tiranës për shkak se “Air Albania” është mbyllur dhe ndeshjet si pritës do të luhen në Elbasan. Partizani luan në stadiumin e vet dhe ky është pa dyshim një forcë më shumë.
NJË FRONT – Ndryshe nga Tirana, Partizani luan vetëm në kampionat dhe ka shansin të përqendrohet 100% për të arritur vendin e parë. Nga ana tjetër, Tiranës do t’i duhet të mendojë edhe për Kupën e Shqipërisë, ku ndodhet në gjysmëfinale.
STOL ME BOLLËK – Partizani gjithashtu ka një stol shumë më të plotë se Tirana. Kolela ka luksin të ndryshojë skemat dhe komplet lojën me ndryshimet që bën, pasi ka lojtarë të aftë ta bëjnë këtë.
/PanoramaSport
Discussion about this post