Banorët e ë Klos të Dibrës kundërshtojnë ndërtimin e gurores që po bëhet për Rrugën e Arbrit, pasi mendojnë që do të kishte pasoja fatale për shëndetin dhe prodhimet bujqësore e blegtorale të gjithë zonës. Kompania “Gjoka Construction”, që po ndërton rrugën e Arbrit dhe pritet ta inaugurojë përfundimisht atë më 28 nëntor, por sipas banorëve po bën manovra për të shfrytëzuar një hapësirë të konsiderueshme pyjore, rreth 250-300 metra pranë shtëpive të tyre, për gurore me afat 3-vjeçar.
Ata sot kanë dalë të protestojnë kundër këtyre punimeve dhe njëri prej tyre shprehet se, Këshilli Bashkiak tenton t’i bindë me premtime false, por që në këto kushte asgjë nuk vlen për negocim pasi bëhet fjalë për jetët e tyre dhe prodhimet, me të cilat mbajnë familjen. “Për mua nuk ka negociata fare. Asnjëri nuk ka pse rri këtu, të ngrihen dhe të ikin. Në asnjë mënyrë të mos lejohet që të preket qoftë edhe një gur i vetëm; Ku do të shkojmë ne, do të hamë pluhurin e gurores?; Këtu nuk duhet të bëhet, pikë. Këtu nuk duhet të lejohet asnjë gjë tjetër sepse këtu pallavrat i marrë era, çdo gjë që vendoset, vendoset në popull”, tha një banor.
Një tjetër banor thotë se, qeveria pretendon se po do sjellë të mira me këtë projekt por në fakt po dëmton zonën, madje do të zhduke fare bujqësinë. Njëri prej tyre u shpreh se do të protestojnë dhe madje tha se ata që vazhdojnë punimet duhen djegur me benzinë. “Po bëjmë mbrapa, shkatërrim. Ky është shkatërrim territori, toke, mjedisi, prishje e klimës, atmosfera prishet komplet me dyoksid karboni. Nëse kjo gjë do të bëhet, në Dibër nuk do të ketë më as bujqësi”, u shpreh një banor tjetër. Këto janë legena, të gjithë do i djegim me benzinë. Të bëjnë provë dhe le të vijnë, nëse nuk ka shtet, këtu ka popull, këta janë maskarenj”, tha një banor i zonës.
Përfaqësues të “Gjoka Construction”, pretendojnë se faza e konsultimit publik është privuar nga pandemia, dhe se vetë kompania ka mbledhur më herët firmat e banorëve që janë pro, shumica e të cilëve sipas banorëve edhe janë punësuar nga kompania për ndërtimin e Rrugës së Arbrit. Por, nga ana tjetër banorët thonë se çdo gjë është manipuluar sepse, kurrsesi asnjë banor nuk do firmoste për diçka që rrezikon jetët dhe prodhimtarit e tyre. Banorët kanë pasur disa herë ankesa për këtë kompani. Disa javë më parë ata treguan se, punimet jo cilësore të kësaj të fundit po rrezikojnë aktualisht jetën e tyre. Madje kanalet kulluese të papërfunduara mirë çojnë ujin tërësisht në banesat e tyre sa bie shi. Por, edhe kjo ankesë nuk është marrë parasysh nga qeveria.
Discussion about this post