Nëntë muaj pas ngjarjes nuk ka ende një vendim për vdekjen e Arjan Salës, i cili vdiq në krye të detyrës nga zjarri në qendrën tregtare “Casa Italia”, ku u vetëflijua duke shpëtuar jetën e 7 kolegëve të tij.
Vëllai i Arjan Salës, Edmond Sala ka reaguar lidhur me neglizhimin nga ana e organeve për këtë ngjarje të rëndë.
Ai shprehet se nuk është hetuar siç duhet mbi shkakun e zjarrit dhe nuk është marrë përgjigjie korrekte nga organet kompetente.
“Kanë kaluar 9 muaj dhe ende nga ana e prokurorisë së Tiranës nuk ka asnjë vendim për atë ngjarje të ndodhur tek qendra tregtare. Ne si familjare të heroit Arjan Sala jemi në pritje të përgjigjes dhe vënies para drejtësisë të autorëve të kësaj ngjarjeje. Ne nëpërmjet edhe mbrojtësit ligjor kemi kërkuar më shumë informacione mbi hetimin e zjarrit por nuk na është dhënë një përgjigje korrrekte dhe e saktë”, ka thënë ai.
Vëllai “Dëshmorit të Atdheut”, i bën thirrje prokurorisë që shkaku dhe shkaktarët e kësaj ngjarjeje të zbardhen sa më shpejt.
“Sot qajnë nëna dhe babai im. Çështja e vëllait tim duhet që së shpejti të marrë zgjidhje dhe mos të mbahet në dollapet e prokurorisë. Unë do bëj të pamundurën që kjo çështje të zgjidhet prandaj kërkoj ndihmën tuaj që ky hetim të nxjerrë përgjegjësit dhe dhimbjet tona të lehtësohen” , deklaron vëllai i Arjan Salës.
Kujtojmë se i riu, shef i sigurisë në një qendër tregtare, hyri në magazinën ku ra zjarri dhe pasi shpëtoi 25 persona, u bllokua mes flakëve dhe humbi jetën.
Trupi i tij u gjet pas 60 orë kërkimesh në katin minus 1 të kësaj godinë, në një dhomë të vogël.
Discussion about this post