Ish-presidenti amerikan, Donald Trump thotë se është paditur me akuza për keqpërdorim të dokumenteve të klasifikuara në pronën e tij në Florida, duke nxitur një ndjekje penale federale që është ndoshta më e rrezikshmja nga kërcënimet e shumta ligjore kundër tij ndërsa zoti Trump kërkon të rimarrë Shtëpinë e Bardhë.
Departamenti i Drejtësisë nuk kishte asnjë koment apo konfirmim të menjëhershëm.
Ish-presidenti amerikan, Donald Trump, shkroi në platformën Truth Social të enjten se administrata e presidentit Biden ka informuar avokatët e tij se ai është paditur.
Një person në dijeni për situatën, i cili nuk ishte i autorizuar për ta diskutuar atë publikisht, tha se avokatët e Trumpit u kontaktuan nga prokurorët pak para se ai të njoftonte në platformën e tij “Truth Social” se ai ishte paditur. Zoti Trump tha se do të dalë në gjykatë të martën pasdite në qytetin e Majamit.
Shtatë akuzat kundër ish-presidentit përfshijnë komplot për të penguar drejtësinë, mbajtje të qëllimshme të dokumenteve dhe deklarata të rreme, sipas dy burimeve në njohuri me aktakuzën.
Ndërkohë në një reagim për Fox News, Trump tha se kjo është një gjueti shtrigash. Sipas tij, padia e radhës është një ndërhyrje në zgjedhje në nivelet më të larta.
“Kjo është administrata më e korruptuar në histori- nuk ka pasur kurrë një administratë kaq të korruptuar. Ata po përpiqen që të shmangin të gjithë pandershmërinë e tyre duke sjellë këtë rast manipulimi qesharak,” tha ai.
“Nuk kam bërë asgjë. Jam totalisht i pafajshëm,” tha Trump.
Discussion about this post