Ka pasur debate të forta në Komisionin e Sigurisë, për shkak se opozita ka kërkuar që seanca me drejtuesen e SHISH Vlora Hyseni të zhvillohet me dyer të hapura, dhe praninë e medias. Me shumicë votash mazhoranca ka vendosur që mbledhja të bëhet e mbyllur, dhe në të të jenë të pranishëm vetëm persona që kanë certifikatë sigurie.
Hyseni është akuzuar nga opozita se ka patur një vizitë sekrete në Serbi, pak para rritjes së tensioneve me Kosovën, që opozita të kërkojë një raportim të saj në Këshillin e sigurisë.
Ish-kryeministri Sali Berisha ishte pari, që përmes një postimi në rrjetet sociale, denoncoi se “Vlora Hyseni drejtuesja e Shërbimit Informativ Shtetëror (SHISH) ka qenë në një vizitë 10-ditore në Beograd”.
Deputetët e opozitës në Komision kanë kërkuar që drejtuesja e SHISH-it të japë gjithashtu sqarime lidhur me pozicionin e Shqipërisë për atë që po ndodh në veri të Kosovës. Ata kanë kërkuar edhe prezencën e kryeministrit Edi Rama në këtë mbledhje për të dhënë sqarime për draftin e propozuar për Asociacionin dhe qëndrimin e qeverisë shqiptare në konfliktin tashmë të përshkallëzuar mes Kosovës e Serbisë.
Ndërkohë ka patur edhe një debat midis deputetit Ervin Salianji dhe kreut të Komisionit të Sigurisë, Nasip Naço. Salianji ka kërkuar fjalën, e cila nuk i është dhënë dhe më pas Naço ka ndërprerë edhe mbledhjen.
DEBATET NË KOMISION:
Naço: Si ta jap fjalën kur nuk kam mbaruar? Jo nuk kam mbaruar, po flas unë.
Salianji: Ma kalo more fjalën për procedurë, pse çfarë e ke ti pronë? Mirë, merre dhe fute në xhep
Naço: Po jo mo çfarë xhepi, ja tek e ke
Salianji: Keni frikë të përballeni me ne
Naço: Po ça frikë ore, dilni nga depresioni që jeni futur, ça frike kemi ne?
Salianji: Je bërë edhe psikolog
Noka: Të flasi njëherë zonja dhe pastaj po pati çështje sensitive të dalin mediat. Tani kjo sjellja “lule mos më prek”. Këtë po bëni ju…
Naço: Unë e kuptoj se shyqyr që janë mediat dhe po bëni protagonistë. Mos ta mbyll fare unë këtë. Dilni nga depresioni njëherë pastaj… 5 minuta pushim.
Discussion about this post