A do të largohet Fernando Santos nga drejtimi i kombëtares polake? Kjo është pyetja që ka trazuar ujërat te rivalët e Shqipërisë në Grupin E të kualifikueseve të Europianit Gjermani 2024.
Një interesim nga Arabia ka bërë që vetë federata polake të dalë me një deklaratë, duke përgënjeshtruar këto zëra, ndërkohë ditën e djeshme ka qenë kreu i federatës i cili ka reaguar në “Twitter”, duke përcjellë disa fjalë të trajnerit portugez, Fernando Santos:
“Kam një mesazh të shkurtër nga trajneri Santos për të gjithë tifozët e kombëtares polake. “Unë kam një kontratë të vlefshme me Poloninë dhe asgjë nuk ka ndryshuar në këtë pjesë. Kërkoj mbështetjen tuaj në luftën për kualifikim në Kampionatin Europian”, shkruan Çezari Kulesa.
Megjithatë këtij mesazhi, në Poloni shumë ish-futbollistë dhe media janë të bindur se nëse skuadra e tyre nuk arrin të fitojë me Shqipërinë në Tiranë në muajin shtator, më datën 10, koha e trajnerit Fernando Santos do të përfundojë.
Discussion about this post