Prokurori i Beratit, Dritan Gripshi është kërcënuar nga një person pranë gjykatës së qytetit.
Denoncimi është bërë nga vetë prokurori, i cili ka shkuar në polici dhe ka denoncuar kërcënimin që ka marrë, sipas tij nga shtetasi Andon Qako.
Prokurori Gripshi ka thënë se është kërcënuar për shkak të detyrës teksa dilte nga ambientet e gjykatës pas një seance gjyqësore.
Sipas tij, Qako ka ndaluar prokurorin dhe më pas e ka kërcënuar, ndërsa policia ka kërkuar menjëherë shoqërimin e autorit të dyshuar.
Qako është një person i njohur në Berat, shpesh i aktivizuar për mbrojtjen e të drejtave të kafshëve, si dhe i përfshirë në disa konflikte të mëparshme.
“Specialistët e Seksionit për Hetimin e Krimeve të Komisariatit të Policisë Berat referuan materialet në Prokurori ku nisi procedimi në gjendje të lirë për shtetasin A. Q., 56 vjeç, banues në Berat, pasi mesditën e sotme, në ambientet e jashtme të Gjykatës së Shkallës së Parë të Juridiksionit të Përgjithshëm Berat, dyshohet se ka fyer dhe ka kanosur drejtuesin e Prokurorisë së Beratit.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme, për veprat penale “Fyerja e gjyqtarit” dhe “Kanosja e gjyqtarit””, njoftoi Policia.
Discussion about this post