“Bëj si them unë, jo si bëj unë”, deputetët pa maskë dhe distancë në komisione

Komisionet Parlamentare po zhvillohen njëkohësisht në Kryesinë e Kuvendit, ndërsa disa prej tyre po diskutojnë për pandeminë e Covid-19.

Te pjesëmarrësit në komisione vihet re që asnjë prej tyre nuk po respekton rregullat anti-Covid, pra asnjëri nuk po mban maskë apo të ruajë distancimin fizik.

Ky veprim i tyre bie ndesh me masat e Komitetit të Ekspertëve që ka vendosur me detyrim maskën për ambientet e mbyllura, ndonëse asnjëri nga ligjvënësit nuk e zbaton.

Komiteti Teknik i Ekspertëve publikoi javës së kaluar masat e reja anti-Covid në kuadër të rritjes së infektimeve në vend, dhe variantit Omicron që po qarkullon në shumë vende të botës.

Kryetarja e Komitetit Teknik të Ekspertëve, Mira Rakacolli bëri të ditur se çdo qytetar +18 vjeç mund të bëjë dozën përforcuese pasi ka kaluar 6 muaj nga doza e dytë. Gjithashtu, ajo njoftoi se punonjësit e marketeve dhe administratës duhet të vaksinohen pasi nisur nga 4 janari do tu kërkohet karta e vaksinimit.