Ministri i Mbrojtjes Niko Peleshi bëri public vendimin e marrë pas mbledhjes së kabinetit qeveritar lidhur me bazën ajrore të NATO-s, që parashikohet të ndërtohet në zonën e Kuçovës.Guri i parë i kësaj baze taktike të NATO-s, sipas Peleshit do të vendoset në janar, pasi është kompletuar kuadri ligjor që i hap rrugën punimeve.
“Në mbledhjen e Këshillit të Ministrave sapo miratuam një vendim, i cili ishte propozim i Ministrisë së Mbrojtjes dhe që lidhet me projektin më madhor në fushën e zhvillimit të infrastrukturës për Forcat tona të Armatosura. Bëhet fjalë për bazën ajrore të Kuçovës e cila me vendimin e sotëm kompleton kuadrin ligjor dhe i hap rrugën punimeve. Në ditët e para të janarit do të vendosim gurin e parë në bazën taktike të NATO-s në Kuçovë. “
Por lajmi për krijim e një baze ushtarake të NATO-s në zonën e Kuçovës ka ngjallur shqetësim tek banorët, banesa e të cilëve do të preket. Ata u shprehën se nuk duan të lejojnë punimet, pasi shtëpitë e tyre nuk vlerësohen sipas tregut. Peleshi në fjalën e tij pas mbledhjes qeveritare u shpreh se banorët do të shpronësohen sipas tregut dhe pa vonesa.
“Lajm i mirë për ata që preken nga shpronësimet, do të shpronësohen sipas vlerës së tregut dhe pa asnjë vonesë. Një lajm i dyfishtë pozitiv për banorët e zonës përreth, dhjetëra mijëra euro investim. Është një lajm i mirë për gjithë rajonin, për sigurinë kombëtare sepse do të kemi një bazë ajrore taktike të NATO-s që do të thotë më shumë siguri”, deklaroi ministri Peleshi.
Banorët u shprehën se janë lajmëruar nga Ministria e Mbrojtjes se do të shpronësohen me një vlerë prej 230 mijë lekësh të reja për dynym, duke e konsideruar këtë si një vlerë qesharake krahasuar me tregun.
Discussion about this post