Kërkoi të lejohet të marrë pjesë në Kuvend, GJKKO vendos për Berishën

GJKKO rrëzoi kërkesën e ish-Kryeministrit Sali Berisha për ta lejuar të marrë pjesë në punimet e Kuvendit.

Berisha kërkoi disa ditë më parë përmes mbrojtësve të tij ligjorë që ti jepej mundësia të merrte pjesë në seancat e Kuvendit.

Sot GJKKO vendosi të rrëzojë kërkesën, ndërsa avokatët e ish-Kryeministrit pritet ti drejtohen Gjykatës së Lartë me një rekurs për të kërkuar ndryshimin e vendimit.

Genc Gjokutaj, avokati i Sali Berishës, tha pas seancës se beteja do të vazhdojë. Gjokutaj, tha se pa ndryshuar porosia e Ramës nuk ndryshon vendimi i Gjykatës.

“Ata vazhduan në të tyren, ne do të vazhdojmë betejën tonë. Edhe praktikat e Strasburgut dhe të gjitha argumentet që ne bëmë, gjykata nuk arriti të konkludonte. Pa ndryshuar porosia e Ramës, nuk ndryshon vendimi i kësaj gjykate”, tha Gjokutaj.

Ish-Kryeministri Sali Berisha prej 30 dhejtorit 2023 ndodhet në masën e sigurisë “arrest në shtëpi” pasi akuzohet për korrupsion me privatizimin e pronave të ish-kompleksit “Partizani”.

Por ish-kryeministri pretendon se ka të drejtë të ushtrojë funksionin e tij si deputet. Për këtë arsye ai përmes avokatëve ju drejtua Gjykatës duke i kërkuar që të mos lejohet që të marrë pjesë në seancat parlamentare që mbahen kryesisht të enjteve. Kjo ishte kërkesa e dytë e bërë prej tyre.

Në 1 shkurt gjyqtarja Irena Gjoka e shtyu seancën sepse kërkesa ishte firmosur nga vajza e Berishës. Gjyqtarja kërkoi që të firmoset nga vetë i akuzuari. Sot u mbajt seanca dhe gjyqtarja ka vendosur që ai të rrijë në izolim duke mos dalë nga banesa.