Tre nga pjesëmarrësit në protestën e djeshme para Bashkisë Tiranë janë proceduar në gjendje të lirë nga policia, ndërsa tre të tjerë janë shpallur në kërkim.
K.K., 27 vjeç, S.G., 40 vjeç, dhe A.Q., 63 vjeç, janë personat e proceduar për akuzat: “Prishja e qetësisë publike”, dhe “Kundërshtimi i punonjësit të policisë së rendit publik”.
Në kërkim janë shpallur: Z.B., 19 vjeç, R.D., 19 vjeç, dhe N.M., 57 vjeç. Sipas policisë së Tiranës, ata akuzohen për veprat penale “Kundërshtimi i punonjësit të policisë së rendit publik”, “Prishja e qetësisë publike”, “Shkelja e rregullave mbi lëndët plasëse dhe djegëse”, “Shkatërrimi i pronës me zjarr”, dhe “Goditjet për shkak të detyrës”, ndërsa materialet i kaluan Prokurorisë.
Pasditen e së Martës u zhvilluar protesta e pestë para Bashkisë së Tiranës pas arrestimeve të drejtorëve të Erion Veliajt lidhur me aferën e njohur si “5D”. Edhe gjatë tubimit të djeshëm, protestuesit kërkuan dorëheqjen dhe arrestimin e Veliajt. Protesta u zhvillua më e ashpër se paraardhëset, me protestuesit që u përplasën me policinë në disa episode.
Për protestat e mëparshme, Policia e Tiranës ka arrestuar më herët disa protestues për përplasje me efektivë dhe hedhje të molotovëve. Megjithatë, protestuesit janë lënë të lirë nga gjykata që ka caktuar ndaj tyre masën e detyrim paraqitjes.
Lexo edhe:
Përplasje me policinë dhe paralajmërime për arrestime të reja – Ç‘ndodhi në tubimin para bashkisë
Discussion about this post