Pas daljes nga SPAK, kryebashkiaku i Tiranës Erion Veliaj bëri disa deklarata të pazakonta, përfshirë “financimin nga PS” të Strukturës së Posaçme Antikorrupsion.
Fillimisht, në prononcimin në mbajtur për gazetarët pas daljes nga prokuroria (ku gënjeu se do ti përgjigjej pyetjeve të mediave) dhe më pas gjatë një fjalimi në mbledhjen online të Këshillat Bashkiak, i quajti prokurorët dhe hetuesit e BKH-së kolegë dhe bashkëpunëtorë. “…E shijova vërtet si eksperiencë profesionale mënyrën si komunikova me kolegët e SPAK-ut…”, tha Veliaj.
Një tjetër deklaratë e pazakontë ishte këmbëngulja se kishte shkuar në Prokurorinë e Posaçme me iniciativën e tij për të dhënë shpjegime për dosjen e inceneratorit të Tiranë – ndërsa akuzohet si “pronar faktik”. Gënjeshtar tjetër kjo e kreut të Bashkisë së Tiranës, e zbuluar nga kreu i SPAK, Altin Dumani. “I është dërguar (Veliajt) fletë-thirrje të mërkurën e javës së kaluar për t’u pyetur në cilësinë e deklaruesit si person që ka dijeni mbi rrethanat e çështjes së inceneratorit të Tiranës”, tha Dumani për “BIRN”.
Broçkulla e radhës ishte paraqitja e Prokurorisë së Posaçme si institucion kryekëput nën varësi të Partisë Socialiste, madje që financohet prej saj.
“… SPAK nuk është Gestapo, janë staf i Republikës së Shqipërisë që me votën e Partisë Socialiste dhe me buxhetin e Partisë Socialiste ka arritur të ndërtojë një institucion për tu pasur zili”, tha gjatë fjalës së mbajtur në mbledhjen online të Këshillit Bashkiak, për të cilën këshilltarët e opozitës akuzuan se u zhvillua jo fizikisht me urdhër të Veliajt dhe në shkelje të ligjit.
Më tej, kryebashkiaku sulmoi opozitën dhe protestuesit duke i etiketuar si “lepuj” apo “çapaçula me molotov”.
Nuk munguan as sulmet ndaj mediave dhe gazetarëve që kanë raportuar dhe analizuar aferat në Bashkinë e Tiranës – që këtë të martë ngritën sërish në protestë qytetarët para zyrës së Veliajt.
“Keni parë burra nga 55, 65 vjeç që rrinë natën televizioneve sikur janë të pështirat apo po shikojnë ‘pornhub’ dhe te eksituar si ata pitbullat shqyejnë çdo gjë të re që kalojnë përpara. Kështu që jam krenar për punët dhe jam krenar për gjithë llumin e bashkuar kundër nesh…”, tha Veliaj.
Ai hodhi akuza ndaj këshilltarëve të opozitës për bojkot të mbledhjeve. Deklaratë që vjen në një kohë kur mbledhja fizike u anulua papritur, ndërsa këshilltarët e opozitës nuk u lejuan të hyjnë në bashkinë e blinduar me forca policore. Nga ana tjetër, Veliaj po refuzon me këmbëngulje kërkesat e opozitës për llogaridhënie në këshill për dosjen “5D” dhe një audit për financat e institucionit.
Discussion about this post