Kryedemokrati Sali Berisha do të vijojë ti japë mesazhet e tij politike nga dritarja e banesës, teksa këtë të martë ka humbur betejën gjyqësore të radhës.
Gjyqtarja e Apelit Iliriana Olldashi la në fuqi vendimin e shkallës së parë për masën e sigurisë ndaj Sali Berishës dhe Jamarbër Malltezit, duke rrëzuar ankimin e këtyre të fundit. Si Berisha ashtu edhe Malltezi ndodhen nën masën e arrestit në shtëpi, të akuzuar për korrupsion në procesin për privatizimin e kompleksit sportiv “Partizani”.
Avokati i Berishës, Genc Gjokutaj hodhi akuza ndaj SPAK pas mbylljes së seancës gjyqësore. “Veprimet hetimore që SPAK po kryen s’ka lidhje me dispozitën e vers penale të korrupsionit”, tha Gjokutaj për gazetarët, duke i përcaktuar “estradë juridike” veprimet hetimore të Prokurorisë së Posaçme.
“Po kryen (SPAK) një akt ekspertimi dadiloskopik të një personi që ka vdekur para 10 vjetësh, që unë se kuptoj dot ku duan të dalin. Le që flitet për një pasuri me vlerë të vogël, po ajo s’ka lidhje… Bashkëpronarët s’kanë asnjë lloj konflikti”, u shpreh avokati.
Duke iu përgjigjur interesit të gazetarëve mbi mundësinë që Berisha të humbë mandatin e deputetit, Gjokutaj pretendon se kjo s’mund të ndodhë pasi kryedemokrati po pengohet të shkojë në Kuvend dhe nuk e ka zgjedhur mosprezencën me dëshirën e tij.
“Zoti Berishës mandatin ja ka dhënë populli. Zoti Berisha nuk mungon në Kuvend për shkak të mungesës së dëshirës së tij siç e kërkon Kushtetuta që thotë ‘mungon pa arsye’. Ne e kemi bërë kërkesën në gjykatë, SPAK, Apel, Gjykatën e Lartë dhe ata kanë vendosur në kundërshtim me Kushtetutën, me praktikën e tyre. Kemi raste të arrestuarish që kanë vajtur në Kuvend dhe kanë votuar. Pra mungesa e zotit Berisha nuk është për faj të tij. Kështu që mandati i tij mbetet i pacënuar ligjërisht”, tha ai.
Discussion about this post