Vëllezërit Bakaj ‘veshin’ Londrën kuqezi, boksierët shqiptarë mbeten të pamposhtur

Të dielën vëllezërit Roberto dhe Amarildo Bakaj kanë marrë fitoret e radhës në boksin profesionist.

Boksieri shqiptar, Amarildo Bakaj, vijon të mahnisë me performancën e tij, teksa mbrëmjen e djeshme triumfoi ndaj ganezit, Maluvi Folivi.

Në ndeshjen e zhvilluar në Londër, shqiptari ishte i papërmbajtshëm.

Pavarësisht se e nisi ndeshjen jo mirë dhe rivali po kryesonte me pikë, Amarildo Bakaj përmbysi gjithçka në raundin e katërt.

Një grusht i fuqishëm nga Bakaj bëri që ai të kthente gjithçka në favorin e tij duke e fituar në fund duelin. Goditja e fuqishme e boksierit shqiptar e detyroi ekipin e ganezit që të hidhnin flamurin e bardhë të dorëzimit në ring.

Kjo ishte ndeshja e 12-të në karrierë për Amarildo Bakajn, që nuk njeh asnjë humbje, por vetëm fitore.

Pas të vëllait, edhe 30-vjeçari Roberto doli në ring kundër rivalit Shaban Hamadi Jongo nga Tanzania. Vetëm dy raunde zgjati ndeshja, me vëllanë e madh Bakaj, që e hodhi në tapet rivalin pas 1 minutë e 37 sekondave të raundit të dytë.

13 fitore me K.O për të, që mban edhe titullin IBO Continental. Për t’u përmendur është edhe fakti se arena në Londër ku u zhvilluan duelet ishte e mbushur me shqiptarë, ku mbizotëroi ngjyra kuqezi.