Pasi SPAK mbylli hetimet për dosjen Partizani, avokatët e tij paraqitën për të firmosur dhe për të tërhequr aktet e hetimit, kryedemokrati Sali berisha tha në një konferencë për gazetarët, se ky është një akt i paprecedentë dhe që është bazuar në një piramidë falsifikimi.
Berisha tha se ky proces është politik, dhe erdhi pas kërkesës së diplomatëve amerikanë Gabriel Escobar dhe Yuri Kim.
Kreu i PD-së tha se pas 4 vitesh hetime shteruese ata që projektuan, porositën hetimin ndaj Berishës e dhëndrit të tij gjetën asnjë provë fakt e dokument e dëshmi që të fajësojnë Berishën e Malltezin.
“Edi Rama kreu i narkoshtetit shqiptar, Altini i pyetjes 1 milionë euro dhe tre apartamenteve, ish xhelati Kraja, ndrikulla Millonai dorëzuan avokatëve të mi në mënyrë përfundimtare dosjen për klubin Partizani me akuzën për korrupsion pasiv për Sali Berishën dhe të njëjtën akuze, por shtuar edhe për pastrim parash për Jamarbër Malltezin.
Ky akt i paparecedentë, i bazuar në një piramidë falsifikimi dhe fshehje të dokumenteve zyrare do të gdhendet në memorien e kohës si një nga veprat më të shëmtuara të narkoshtetit në Shqipëri.
Në këtë piramidë, prokurorët politikë të prokurorisë private të Ramës kanë rrjeshtuar duke i shumëzuar për dy të gjitha mashtrimet e renditura në dokumentin me të cilin ata shpallën në hetim Berishën dhe Malltezin dhe vendosën në kundërshtim me kushtetutën dhe konventës evropiane, arrestin në shtëpi dhe komunikimin me çdo person tjetër përveç familjarëve dhe ndalimin e ndjekjes së kuvendit, ndonëse pa asnjë masë dënimi siç kërkojnë ligjet.
Ky proces politik kundër Berishës erdhi pas kërkesës së përsëritur të diplomatëve të korruptuar amerikanë Escobar dhe Yuri Kim, pas kërkesës së Ramës në asamblenë e tij që Sali Berisha të persekutohej, ndiqej e penalizohej. Por sot pas 4 vitesh hetime shteruese ata që projektuan, porositën hetimin ndaj Berishës e dhëndrit të tij gjetën asnjë provë fakt e dokument e dëshmi që të fajësojnë Berishën e Malltezin. Kështu që do t’u mbetet turpi njëherë e përgjithmonë për aktet e tyre. Kjo akuzë është një piramidë mashtrimi që bazohet në shtyllat kryesore”, u shpreh Berisha.
Discussion about this post