Argjentina mundi Bolivinë me rezultatin e thellë 6:0, në ndeshjen kualifikuese për Kupën e Botës, sfidë ku Leo Messi shkëlqeu duke u bërë protagonist në pesë gola.
Messi shënoi hat-trikun e tij të dhjetë me fanellën e kombëtares në ndeshjen e luajtur në stadiumin Monumental të Buenos Aires.
Anëtari i Inter Miami hapi serinë e golave në minutën e 19-të, pas një asistimi nga Lautaro Martinez, derisa het-trikun e kompletoi me dy gola në fund të ndeshjes duke realizuar në minutat 84 dhe 86-të.
Me këta tre gola e dy asistime, Messi ka 112 gola dhe 60 asistime, ndërsa për Argjentinën mbrëmë shënuan përveç tij Lautaro Martinez, Julian Alvarez dhe Thiago Almada.
“Është shumë bukur të vish këtu dhe të ndjesh dashurinë e njerëzve. Kjo është ajo që më shtyn. Pavarësisht moshës, ndihem fëmijë dhe rehat në këtë ekip. Për sa kohë që ndihem kështu dhe luaj në nivelin që dua. Unë do të vazhdoj ta shijoj atë”, tha Messi.
Argjentina vazhdon të jetë lider në grup me 22 pikë pas 10 ndeshjeve, ku kanë marrë shtatë fitore, një barazim dhe dy humbje.
Discussion about this post