Dy vila te rezidenca “Kodra e Diellit” në Tiranë, në pronësi të Monika Kryemadhit dhe të ëmës së saj, janë sekuestruar me një vendin të Gjykatës së Posaçme, që ka aprovuar kërkesën e SPAK.
Vendimi i Gjykatës së Posaçme është ekzekutuar nga policia gjyqësore në datat 19 dhe 20 Nëntor 2024, duke vendosur bllokimin e pasurive në regjistrat e Agjencisë Shtetërore të Kadastrës, si dhe duke ua komunikuar këtë vendim pronarëve të pasurive, tha SPAK në një njoftim për mediat këtë të mërkurë.
Dy pasuritë e sekuestruara janë me sipërfaqe 448.9 m2 secila. Bëhet fjalë për vila dykatëshe me kat nëntokë dhe verandë. Në njoftim, prokuroria specifikon se njëra nga pasuritë e sekuestruara ka sipërfaqen e katit përdhe 152 m2, nga të cilat 82 m2 banesë dhe 70 m2 verandë; kati nëntokë 139 m2, kati i dytë 51 m2, verandë kati i dytë 27.9 m2. Kjo vilë është në pronësi të nënës së deputetes, Fatime Kryemadhi.
Ndërsa banesa e ish-kryetares së PL-së dhe ish-bashkëshortja e kreut aktual të kësaj partie Ilir Meta që është sekuestruar ka sipërfaqe: kati përdhes 152 m2, nga të cilat 82 m2 banesë dhe 70 m2 verandë, kati nëntokë 139 m2, kati i parë 79 m2, kati i dytë 51 m2, verandë kati i dytë 27.9 m2, në pronësi të M.K..
Kërkesa e SPAK për sekuestrot depozituar në gjykatë vjen në kuadër të procedimin penal ku të pandehur janë Monika Kryemadhi, Ilir Meta dhe dy persona të tjerë. Kryemadhi dhe Meta akuzohen për veprat penale të korrupsionit pasiv, pastrim parash dhe fshehje pasurie. Të dy i kanë mohuar akuzat duke i quajtur politike.
Ilir Meta është lënë nën masën e sigurisë arrest në burg nga të dyja shkallët e gjyqësorit, ndërsa Kryemadhi në detyrim paraqitje. E njëjta masë është caktuar për dy të akuzuarit e tjerë të procedimit penal, Pirro Xhixho dhe Ema Çoku.
Discussion about this post