Avokat Spartak Ngjela ka reaguar në lidhje me skandalin e fundit në vend, për publikimin e pagave dhe të dhënave të mijëra qytetarëve. Përmes një postimi në Facebook ai shkruan se, ka shumë gjasa që kjo të jetë pjesë e strategjisë për konkretizuar luftën kundër korrupsionit dhe informalitetit në vend.
“Një ditë më parë në emisionin Pikat mbi i pyeta a mos ndoshta kjo që po ndodh me listën e pagave, mund të jetë parathënie për të vijuar më tej me fakte të publikuara konkretizimin e luftës antikorrupsion? Tani, këtë nuk e kam më pyetje. Kjo po duket se është një skemë e studiuar për të filluar aktin e fundit drejt eliminimit të korrupsionit në Shqipëri, në një spektër shumë të gjerë. Po të jetë kështu, Shqipëria ka hyrë në triumfin e saj historik.
Shenjat janë se po tregohet që, në listën e pagave, janë vendosur bashkë: qeveri, deputetë, gazetarë dhe krimi i lidhur me politikën e lartë shqiptare. Shenjat të japin të kuptuar që aty brenda dallon se ka qenë nën investigim evozioni fiskal, pastrimi i parasë, korrupsioni qeveritar, dhe një sërë edhe më e gjatë e hetimit të krimit shtetëror dhe krimit të organizuar; në të dy krahët e politikës”, tha ai.
Gjithsesi, Ngjela thekson se qeveria duhet të mbajë përgjegjësi dhe të tregohet më transparente me qytetarët, duke mos lejuar cenimin e privatësisë.
“Por, këtu del kjo pyetje: ata që e kanë nisur këtë shfaqe, a do ta kalojnë edhe tek kontot bankare dhe pronat e paluajtshme? Në fakt kjo pritet të shihet; dhe po u shfaq si e tillë, atëherë ajo që shpreha në këtë shkrim është një e vërtetë faktike. Duhet pritur. Por shenjat janë se, ky që po vjen, do të jetë një janar i nxehtë. As qeveria dhe as opozita nuk po flet për këtë ngjarje. Është kjo, frikë apo mospërfillje? Po për qeverinë Rama, çfarë është?
Deri tani duket se qeveria Rama nuk i shpëtonte dot përgjegjësisë; megjithatë duhet pritur nëse do ta ketë apo jo vazhdimësi në këtë proces brenda apriorizmit për një proces antikorrupsion, ashtu siç u shpreha më lart në këtë analizë”, u shpreh Ngjela. Kujtojmë se brenda dy ditëve janë publikuar listat me pagat e janarit, të prillit dhe numri i celularit për mijëra punonjës shqiptar dhe ende nuk është zbuluar përgjegjësi i këtij skandali.
Discussion about this post