Elbasani sjell në krye të skuadrës trajnerin që surprizoi Superioren

Ivan Gvozdenoviç do të jetë trajneri i ri i Elbasanit.

Mësohet se palët kanë arritur marrëveshjen dhe në orët në vijim pritet zyrtarizmi nga vetë klubi.

Ivan Gvozdenoviç e njeh mirë kampionatin shqiptar, pasi vetëm pak ditë më parë u largua nga Skënderbeu, ekip me të cilin arriti të surprizojë në Superiore sezonin e kaluar, me rezultatet dhe lojën e shfaqur në fushë.

Më herët gjatë kësaj të enjteje, klubi i Elbasanit zyrtarizoi ndërprerjen e bashkëpunimit me trajnerin Roberto Bordin.

“AF Elbasani njofton publikun për shkëputjen e bashkëpunimit me trajnerin Bordin. Tekniku italian ka paraqitur dorëheqjen kështu duke u larguar nga drejtimi i ekipit. Familja verdheblu i uron suksese në vazhdim”, thuhej në një njoftim të klubit.

Në 16 javë të luajtura në Superligë, Elbasani mban vendin e pestë me 21 pikë, katër më pak nga Vllaznia e vendit të katërt dhe është një pretendent serioz për të arritur “Final Four”.