Pesëmbëdhjetëvjeçari i cili u plagos me armë zjarri mbrëmjen e djeshme në Tiranë, është qëlluar nga xhaxhai. Ky është konkluzioni paraprak i grupit hetimor që ka shpallur në kërkim autorin e dyshuar të ngjarjes.
Ngjarja ndodhi në oborrin e përbashkët të banesave të vëllezërve Pëllumbi në Fushë Mëzez. Sipas policisë, në vazhdën e një konflikti “për motive të dobëta”, një prej vëllezërve – 29-vjeçari Nazmi Pëllumbi qëlloi me armë zjarri drejt binjakut. Plumbat prekën nipin 15-vjeçar, i cili mbeti i plagosur dhe ndodhet në spital ku po merr ndihmë mjekësore.
Ndërkaq, u vu në pranga vëllai i autorit dhe babai i të plagosurit, Florant Pëllumbi, pasi gjatë kontrolleve në banesën e tij u gjet një sasi e vogël kokaine.
Akuzat
Nazmi Pëllumbi, 29 vjeç, u shpall në kërkim për veprat penale “Vrasja me dashje”, mbetur në tentativë”, “Plagosja e rëndë nga pakujdesia” dhe “Mbajtja pa leje dhe prodhimi i armëve, armëve shpërthyese dhe i municionit”.
Florant Pëllumbi, 29 vjeç, u arrestua për veprën penale “Prodhimi dhe shitja e narkotikëve”, pasi gjatë kontrollit në banesën e tij u gjet një sasi kokaine, e cila u sekuestrua në cilësinë e provës materiale.
“Në përfundim të veprimeve të para hetimore ka rezultuar se shtetasi Nazmi Pëllumbi gjatë një konflikti për motive të dobëta me vëllanë e tij binjak, shtetasin Florant Pëllumbi në oborrin e përbashkët të banesave të tyre, ka qëlluar me armë zjarri në drejtim të tij. Nga këto të shtëna ka mbetur i dëmtuar 15-vjeçari (djali i vëllait tjetër të tyre), i cili vijon të jetë në kujdesin e mjekëve. Materialet procedurale i kaluan Prokurorisë, për veprime të mëtejshme”, njoftoi policia.
Lexo edhe:
Plagosja e 15-vjeçarit pas sherrit mes vëllezërve, çfarë zbuluan kamerat e sigurisë
Discussion about this post