Në zgjedhjet parlamentare të 11 majit 2025, Shqipëria u përball me një realitet që sfidon drejtpërdrejt propagandën e qeverisë për përparim drejt Bashkimit Europian. Teksa Edi Rama deklaron se vendi do të anëtarësohet në BE deri më 2027, ajo që ndodhi në terren flet për një vend që akoma përballet me kushte të papranueshme për një proces demokratik.
Votim në kontejnerë në Yzberisht – “Europa” me qira tre vjet rresht
Në zemër të kryeqytetit, në zonën e Yzberishtit, qytetarët votuan për të tretin vit radhazi në 23 kontejnerë të vendosur në mes të rrugës. Kjo jo vetëm që dëshmon për mungesën kronike të infrastrukturës, por është edhe simbol i ironisë mes integrimit europian dhe standardeve primitive të votimit.
Me mushkë drejt kutive të votimit në Kukës
Në Zapod të Kukësit, qeveria që flet për digjitalizim e teknologji, dërgoi fletët e votimit me mushkë për shkak të mungesës së rrugëve të aksesueshme. Një vend që aspiron të jetë pjesë e BE-së në më pak se dy vjet, dërgon materialet zgjedhore me kafshë.
Dollapi i vjetër, dhomë votimi në Lushnjë
Në fshatin Zhanë të Lushnjës, qytetarët u futën në një dollap të vjetër rrobash për të votuar. Në vend të një cabine që garanton fshehtësinë e votës, zgjedhësit u përballën me një strukturë qesharake dhe poshtëruese, që tregon nivelin alarmant të mosrespektimit të standardeve bazë demokratike.
Rama flet për Europë, realiteti tregon lindje të egër
Kryeministri Rama e ka shitur 11 majin si një “votim për Europën”, por realiteti në terren është i pajustifikueshëm. Me mushkë në veri, dollapë në jug dhe kontejnerë në kryeqytet, Shqipëria e Ramës është më afër një satire politike sesa një shteti gati për integrim.
BE ka kërkuar vazhdimisht reforma serioze, veçanërisht në drejtësi dhe luftë kundër korrupsionit. Por zgjedhjet e fundit nuk dhanë asnjë shenjë përparimi. Përkundrazi – ishin një dush i ftohtë për çdo iluzion europian që qeveria përpiqet të mbajë gjallë me spote dhe retorikë.
Discussion about this post