Rreth 254,000 izraelitë kanë marrë një dozë të katërt vaksine kundër Covid në javën e parë të disponueshmërisë, tha të dielën Ministria e Shëndetësisë, ndërsa vendi po përballet me një rritje të infeksioneve për shkak të variantit Omicron.
Sipas mediave të huaja, vetëm personat mbi 60 vjeç, stafet mjekësore dhe ata me sistem të dobët imunitar kanë të drejtë për një injeksion të katërt.
Kryeministri izraelit Naftali Bennett vlerësoi të dielën marrjen në numër të lartë të vaksinave nga grupet më të rrezikuara si “një përgjigje e jashtëzakonshme që do të parandalojë shumë sëmundje dhe vuajtje të rënda”.
Për shkak të përhapjes së variantit më të transmetueshëm Omicron, vendi ka parë një rritje të paprecedentë të infeksioneve të reja ditore, duke regjistruar më shumë se 17,500 raste të dielën, sipas Ministrisë së Shëndetësisë.
Në dritën e numrit në rritje të rasteve, gjithashtu në mesin e punonjësve mjekësorë, Ministria e Shëndetësisë po shqyrton mundësinë e lejimit të mjekëve dhe infermierëve që të vazhdojnë të punojnë edhe kur rezultojnë pozitivë me Covid për sa kohë që ata nuk shfaqin asnjë simptomë.
Vetëm rreth 61 për qind e 9.4 milionë izraelitëve konsiderohen ende të vaksinuar, që do të thotë se ata janë vaksinuar dy herë dhe kanë kaluar më pak se gjashtë muaj pas vaksinimit të dytë, ose kanë marrë një vaksinim përforcues.
Discussion about this post