Ukraina mund të mbështetet te pjesëmarrja e SHBA-së në një angazhim sigurie të ngjashëm me zotimin e mbrojtjes së përbashkët të NATO-s, tha sot presidentja e Komisionit Evropian Ursula von der Leyen në një konferencë shtypi me presidentin ukrainas.
“Ne e mirëpresim gatishmërinë e presidentit Donald Trump për të kontribuar në garanci sigurie të ngjashme me Nenin 5 për Ukrainën”, tha Von der Leyen përkrah presidentit ukrainas Volodymyr Zelensky në Bruksel.
“I ashtuquajturi ‘Koalicioni i të vullnetshmëve’ që përfshin Bashkimin Evropian, është gati të japë kontributin e tij”, shtoi ajo.
Ky koalicion është një grupim i lirshëm shtetesh që mbështesin Kievin kundër pushtimit të plotë rus të nisur në shkurt 2022.
Neni 5 i traktatit të NATO-s përcakton se shtetet anëtare mund të mbështeten te aleatët e tyre në rast sulmi, duke e konsideruar një sulm ndaj një anëtari si sulm ndaj të gjithëve.
Pas paraqitjes për shtyp, Zelensky dhe Von der Leyen do të merrnin pjesë në një videokonferencë të “Koalicionit të të vullnetshmëve” për të diskutuar hapat e ardhshëm.
Zelensky, i shoqëruar nga disa liderë evropianë, pritet të takohet nesër me presidentin Trump në Uashington.
Discussion about this post