Presidenti i Republikës, Bajram Begaj priti sot në takim përfaqësuesit e shoqatës së kontabilistëve të rinj shqiptarë që veprojnë në Itali, si edhe përfaqësues të shoqatës së kontabilistëve italianë.
Presidenti Begaj përgëzoi iniciativën e të rinjve profesionistë shqiptarë për të kontribuar me potencialin dhe ekspertizën e tyre në Shqipëri, si edhe për krijimin e një ure komunikimi dhe bashkëpunimi midis profesionistëve të diasporës dhe institucioneve shqiptare.
Kreu i Shtetit shfrytëzoi këtë takim për të falënderuar edhe një herë Italinë mike për mirëintegrimin e shqiptarëve në shoqërinë italiane, si edhe për rolin e saj si partneri kryesor tregtar dhe një nga investitorët më të rëndësishëm në vend.
Në fokus të bisedës ishte, gjithashtu konferenca “Shqipëria: Urë Mundësish – Investime Strategjike për të Ardhmen”, e cila do të zhvillohet më 18-19 shtator 2025 në Tiranë, me iniciativë të dy shoqatave.
Kreu i Shtetit shprehu mbështetjen e tij për nisma të tilla që ndikojnë në zhvillimin e qëndrueshëm dhe afatgjatë.
Mundësitë që Shqipëria ofron për biznesin italian do të diskutohen më 18 dhe 19 shtator 2025 në Tiranë, në konferencën me temë “Shqipëria, Urë Mundësish – Investimet Strategjike për të Ardhmen”.
Në këtë aktivitet do të jetë një delegacion me mbi 50 biznesmenë italianë, të angazhuar në fusha si turizmi, bujqësia, energjia e rinovueshme dhe start-up-et, të cilët do të njihen nga afër me potencialet e tregut shqiptar.
Konferenca synon të nxisë investime në sektorë strategjikë të ekonomisë shqiptare, duke krijuar një hapësirë të dedikuar për diskutime dhe marrëveshje konkrete mbi investimet italiane në Shqipëri.
Discussion about this post