Ish-Presidenti Bamir Topi ka komentuar protestën e 8 janarit të thirrur nga ish-kryeministri Sali Berisha, ku deklaroi se sipas tij nuk ka fitues dhe se palët janë të dyja humbëse për mënyrën e menaxhimit.
Teksa ka analizuar qëndrimet dhe deklaratat e Berishës se do të rikthehet në bazë, Topi theksoi në “News24” se ai do vazhdojë me periferinë dhe kur të bindet që e ka domenin e tij, do i kthehet Tiranës.
“Gradualisht është duke rritur intensitetin dhe kërkon të marrë sa më shumë audiencë. Audienca nuk është heterogjene, është homogjene. Do të marrë pjesën më vitale të PD për ta lënë Bashën në minorancë. Ne po bëjmë disa parashikime që nuk lidhen thjesht me koshiencën por edhe subkoshiencën. Ai e fillon atje, por sigurisht vëmendjen kryesore e ka këtu. Deklaratat kanë qenë ekstreme jo se ka qenë i bindur se këtë seli do ta merrte. Sa kohë ajo seli zyrtarisht i takon një individi, i cili është person juridik, menjëherë policia do shkojë në mbrojtje të këtij identiteti. Ai ka ndryshuar taktikën dhe për të kamufluar që nuk ka një protestë të dytë në Tiranë. Ai e kamuflon, thotë kam ndryshuar taktikë. Do vazhdojë me periferinë dhe kur të bindet që periferinë e ka domenin e tij, atëherë do i kthehet Tiranës”, tha Topi.
Discussion about this post