Me bllokada të shumta në rrugët kryesore, autostrada dhe pikat doganore, mobilizimi i fermerëve në Greqi po hyn në një fazë edhe më të ashpër. Ndërsa protestat shtrihen në të gjithë vendin, të gjitha gjasat janë që javën e ardhshme Komiteti Panhelenik të vendosë koordinimin e veprimeve të mëtejshme.
Qeveria greke deklaron se është e gatshme të dialogojë, por thekson se nuk do të tolerojë sjellje të dhunshme. Zëdhënësi i qeverisë, Pavlos Marinakis, tha se “dialogu nuk mund të zhvillohet kur shfaqen incidente serioze si ato jashtë aeroportit ‘Maqedonia’ në Selanik apo sulmet ndaj policisë”. Ai shtoi se ligji do të zbatohet pa asnjë përjashtim.
Të premten pasdite, situata u tensionua pranë aeroportit “Maqedonia” në Selanik. Fermerët e zonës u përpoqën të çanin kordonët e policisë për t’u afruar te aeroporti.
Në një moment, një traktor u kthye me shpejtësi drejt forcave policore, ndërsa në turma u dëgjuan thirrje për të goditur një oficer. Disa protestues arritën të kapërcenin barrierat dhe tentuan të bllokonin rrugën nga brenda Shkollës Bujqësore, ku rrëzuan gjithashtu një polic.
Fermerët bllokuan përkohësisht rrugën në mbikalimin e Thermit, duke lënë të qarkullonin vetëm ambulancat dhe rastet urgjente. Në Serres, autostrada Egnatia u mbyll pranë Kerdyllias, ndërsa bllokime të tjera u ngritën në Komotini dhe Kouloura.
Në Thesali, protesta është më masive. Mbi 4,000 traktorë janë vendosur në kryqëzimin e Nikaias, në aksin Athinë–Selanik, si dhe në autostradën E65 pranë Kardhicës dhe në pikën e pagesës Longos në Trikala.
Fermerët do të mblidhen të dielën për të vendosur për hapat vijues, ndërsa nga e hëna pritet përshkallëzim i veprimeve, përfshirë edhe mbylljen simbolike të rrugëve anashkaluese dhe bllokimin e portit të Volosit.
Bllokime priten edhe në Greqinë Qendrore, përfshirë zonën e Bralos dhe Kastro, ndërsa në Aitoloakarnania dhe Vonitsa protestat pritet të intensifikohen nesër.
Fermerët kanë bllokuar doganat kryesore të vendit: Kipi, Exochi, Promachona, Evzoni, Niki, si dhe aksin drejt doganës së Kakavias. Në disa pika kalimi është i lejuar vetëm për automjete të vogla dhe autobusë, ndërsa kamionët me mallra të prishshme lejohen në mënyrë selektive.
Në Promachona, fermerët ndërruan ritmin e bllokadave gjatë ditës, duke lejuar për disa orë qarkullimin normal përpara se të mbyllnin sërish kufirin për kamionët deri në orën 22:00.
Në doganën e Kipit, në Evros, mbi 200 traktorë dhe mjete bujqësore mbajnë të bllokuar pikat e kalimit prej pesë ditësh. Rreth 500 kamionë janë të bllokuar në anën greke, duke krijuar radhë të gjata në boshtin Aleksandropolis–Ormenio dhe në segmentin vertikal të autostradës Egnatia.
Edhe në Lesbos pati reagime, ku fermerët derdhën qumësht në rrugë si shenjë pakënaqësie ndaj politikave bujqësore.
Në pritje të vendimeve të javës së ardhshme, situata në Greqi mbetet e nxehtë, ndërsa fermerët paralajmërojnë se do të vazhdojnë protestat derisa kërkesat e tyre të dëgjohen dhe të marrin zgjidhje konkrete.
Discussion about this post