Shqipëria, nëse arrin të sigurojë biletën për Botërorin 2026 përmes play-off-it, do të përballet me një kalendar sfidues jo vetëm për nga kundërshtarët, por edhe për shkak të orareve të pazakonshme të ndeshjeve. FIFA publikoi sot oraret dhe stadiumet e të gjitha sfidave të turneut, duke përfshirë edhe ato të Grupit F, ku mund të përfshihen kuqezinjtë.
Siç ishte parashikuar, oraret janë përcaktuar sipas zonës kohore të Amerikës Lindore, që ka një diferencë prej gjashtë orësh me Europën Qendrore dhe me Shqipërinë. Kjo do të thotë se ndjekja e ndeshjeve do të kërkojë orë të vona, ose shumë të hershme, për tifozët shqiptarë.
Sipas kalendarit, sfida e parë hipotetike e Shqipërisë është ajo ndaj Tunizisë, e planifikuar në Monterrey të Meksikës. Ajo do të nisë më 14 qershor në orën 22:00 me kohën e Amerikës Lindore, që do të thotë ora 04:00 e mëngjesit në Shqipëri, më 15 qershor.
Ndeshja e dytë, kundër Holandës, në Huston, më 20 qershor, starton në orën 13:00 lokale, duke u përkthyer në orën 19:00 në vendin tonë. Ky është orari më i favorshëm për tifozët kuqezinj, që do ta kenë më të lehtë ta ndjekin sfidën.
Ndërkaq përballja e tretë, ajo ndaj Japonisë, në Dallas më 25 qershor, është sërish në një orar të vështirë. Me fillim në orën 19:00 lokale, ndeshja do të luhet në orën 01:00 pas mesnate të datës 26 qershor sipas orës europiane.
Nëse Shqipëria arrin të shkojë në Botëror, tifozët do të kenë emocione të mëdha, por edhe net pa gjumë.
Discussion about this post