Ish-Ambasadori i Kosovës në Maqedoninë e Veriut, Gjergj Dedaj ka kërcënuar hapur presidenten Vjosa Osmani dhe bashkëshortin e saj Prindon Sadriu.
Ai ka paralajmëruar për hakmarrje me kanun presidenten dhe të shoqin, me arsyetimin se ndihet i rrezikuar siç e quan ai nga “Klani Osmani“. Ai është shprehur në një media në Kosovë, se është njeri i ligjit, por se nuk duhet harruar se vjen nga Malësia e Gjakovës, ku vepron Kanuni i Lekë Dukagjinit.
“Unë jam i ligjit, mirëpo ne jemi shqiptarë. Nuk mundesh dikë që ke inat ta vrasësh. Unë jam i rrezikuar, nga Klani i Osmanit, i Vjosës dhe bashkëshorti i saj, nga njerëzit e saj dhe i listës Guxo. Nuk di që duhet me pas kërcënim tjetër kur ta rrezikojnë jetën, të lënë të pafytyrë, të heqin nga lista e pagave”, tha Dedaj.
Ai ka thënë se nëse dikush vret nga familja e tij, do të vrasë edhe ai, nisur nga Kanuni i Lekë Dukagjinit.
“Përveç ligjit të unë dhe familja ime nga Malësia e Gjakovës vepron edhe kanuni i Lekë Dukagjinit. Nëse me shkel dikush, me vret dikush ka mu vra edhe ai. Edhe ai ka me pas pasoja”, ka thënë Dedaj.
Këto deklarata të Dedajt si duket vijnë si reagim ndaj raportimeve të djeshme se ai është në kërkim të policisë së vendit, pasi Ministria e Punëve të Jashtme ka lëshuar urdhër për konfiskimin e tabelave të makinave zyrtare dhe të ID-ve diplomatike që po vazhdojnë të mbahen paautorizim nga ish-ambasadori Gjergj Dedaj dhe ish-konsulli, Lindon Kqira.
Discussion about this post