Deputetja e Partisë Demokratike, Jorida Tabaku, gjatë një takimi me të rinjtë në Shkodër, deklaroi se forca politike ku ajo bën pjesë nuk ka luksin të humbasë asnjë figurë të saj.
Në një bashkëbisedim, duke iu përgjigjur pyetjes së një të riu nëse ish-deputeti Ervin Salianji duhet të lejohet të kandidojë përballë kreut aktual Sali Berisha në zgjedhjet e brendshme, Tabaku theksoi se PD nuk duhet të përjashtojë askënd dhe e ftoi Salianjin të marrë pjesë në diskutimet e brendshme të selisë blu.
“E kam ndjekur në media diskutimin e zotit Salianji dhe kërkesa ime për të është që betejën ta bëjë në PD, boll ka vuajtur PD këto vite me beteja të bëra në studiot televizive.
Nuk ka rëndësi ku jam unë apo Salianji nesër, por ku do të jetë PD dhe demokratët. Për mua ky debat duhet të bëhet brenda PD, kur bëhet jashtë është shqetësuese. Nuk e shoh te PS psh të ndodhë jashtë. Kemi boll forume për të folur.
Gabimi që bëra në 3 vite të shkuara nuk do ta bëj sot, nuk kam për të dhënë mendime që kam për t’i dhënë në forumet e partisë. Nuk di të ketë një vendim të Kryesisë për t’i mbyllur dyert.
Lë t’i lëmë kohë institucioneve dhe debatit të brendshëm që të marrë vendimin e duhur. Për mua PD nuk ka luksin të humbë askënd, ne duhet të shtohemi e zgjerohemi, t’ia shtrijmë dorën kujtdo. Në një parti politike vendos vota”, tha ajo.
Discussion about this post