Pak para dëshmisë që do të japë sot në rolin e dëshmitarit në GJKKO për gjyqin e dosjes ‘Partizani’, kreu i grupit parlamentar të PS-së, Taulant Balla është ndalur në një prononcim për mediat.
Ai tha se i qëndron kallëzimit të bërë ndaj Berishës për këtë çështje deri në fund.
Balla deklaruoi se sot ka politikanë që kanë bërë korrupsion dhe ata janë para drejtësisë.
Sipas Ballës, të gjithë ata politikanë që paraqiten në SPAK duhet të mbështesin punën e prokurëve.
“Kjo është një ditë e madhe për Shqipërinë që në bankën e të akuzuarve gjenden një ish-kryeministër, ish-president për korrupsion. A kanë bërë politikanët korrupsion në Shqipëri? Pa dyshim që kanë bërë korrupsion. Ajo që thamë në 2016 kur miratuam reformën në drejtësi, që do të vijë një ditë në Shqipëri kur politikanët do gjenden në bankën e të akuzuarve për korrupsion.
Shqiptarët kanë më shumë besim tek drejtësia dhe drejtësia po forcohet dita ditës. Ajo që mendoj unë që politikanët që vijnë këtu duhet të mbështesin drejtësinë dhe punën e prokurorëve që po çmontojnë korrupsionin shumëvjeçar në Shqipëri”, tha Balla.
Po ashtu, ai deklaroi se “kallëzimit ndaj Sali Berishës për këtë dosje i qëndron fjalë për fjalë”.
“Që nga viti 1912 Shqipëria s’ka qenë kurrë më afër Europës se sa sot, dhe arsyeja është reforma në drejtësi, që ka rikthyer besimin te drejtësia. Këta në bankën e të akuzuarit më kanë akuzuar mua për shpifje në 2012. Ky është rast tipik i korrupsionit të nivelit të lartë. 5 për qindshi është korrupsion. Unë do përgjigjem për çfarë të më pyesin, por i qëndroj kallëzimit tim”, tha Balla.
Ndërsa i pyetur për Ballukun, se mazhoranca socialiste përdor dy standarde, Balla tha “sot flasim për korrupsion, çështja për të cilën flet ti nuk është korrupsion, është dallimi i madh”.
Discussion about this post