Gjykata ka rrëzuar kërkesën për përjashtimin e gjyqtares Marinela Osmani nga shqyrtimi i çështjes që lidhet me kërkesën për pushimin e procedimit penal ndaj gjyqtares Irena Gjoka, e kallëzuar për falsifikim dokumentesh.
Vendimi u mor nga gjyqtarja Rudina Palloj, e cila vlerësoi se nuk ekzistojnë shkaqe ligjore që justifikojnë largimin e Osmanit nga shqyrtimi i dosjes.
Kërkesa ishte paraqitur nga kallëzuesit Adriana Kalaja dhe Jamarbër Malltezi.
Dy kallëzuesit kanë kërkuar gjithashtu që shqyrtimi i kërkesës së SPAK për pushimin e hetimeve të mos zhvillohet në GJKKO, duke argumentuar se kjo gjykatë ndodhet në konflikt interesi.
Hetimi ndaj gjyqtares Gjoka u nis në qershor të vitit 2025 për veprën penale falsifikim i vulave, stampave ose formularëve, pas denoncimeve të bëra nga kreu i PD, Sali Berisha.
“Në përgjigje të kërkesës suaj, çështja është në fazën e hetimeve paraprake. Bazuar në nenet 103 dhe 279 të Kodit të Procedurës Penale, veprimet hetimore që kryhen në këtë fazë përbëjnë sekret hetimor. Duke iu referuar këtyre neneve, nuk mund të bëjmë me dije veprimet hetimore apo rezultatet e tyre,” njofton SPAK.
SPAK i ka dërguar kërkesë në GJKKO për pushimin e hetimeve ndaj gjyqtares për veprat penale “Falsifikimi i vulave, i stampave ose i formularëve”.
SPAK bën të ditur se pavarësisht se materialet e administruara tregojnë se Irena Gjoka ka përdorur dokumenta të parregullta dhe ka tentuar të hyjë në Greqi duke përdorur identitete të ndryshme, në dëshminë e penalitetit të lëshuar nga autoritetet greke, nuk ka të dhëna për dënimin e saj në vendin fqinj.
Gjithashtu, SPAK thotë së nuk rezulton të jetë administruar dokumentacion që provon njoftimin e vendimit gjyqësor ndaj saj, si dhe nuk evidentohet marrja dijeni për ekzistencën e këtij vendimi në kohën e dhënies së tij.
SPAK deklaron se rezulton se edhe sikur të merrej e mirëqenë ekzistenca e këtij vendimi penal, ndjekja penale lidhur me këtë fakt rezulton e shuar për shkak të parashkrimit, në përputhje me legjislacionin përkatës të aplikueshëm.
Procedimi ishte regjistruar më 5 qershor 2025, pas një kallëzimi të depozituar nga Adriana Kalaja, në cilësinë e kryetares së Komisionit të Apelimit dhe Vlerësimit të Statutit në Partinë Demokratike.
Përmes denoncimit ajo kishte pretenduar për falsifikim dokumentesh, shpërdorim detyre dhe ushtrim ndikimi të paligjshëm nga ana e Gjokës.
Discussion about this post