Një shqiptar i shpallur në kërkim ndërkombëtar për një vrasje të ndodhur në vitin 1999 është arrestuar në Greqi, në kuadër të operacionit policor të koduar “The Wanted”.
Në pranga ka rënë Albert Kapllanaj, 58 vjeç, i cili kërkohej nga drejtësia shqiptare për të vuajtur pjesën e mbetur të dënimit me burg.
Sipas Policisë së Shtetit, Gjykata e Shkallës së Parë e Juridiksionit të Përgjithshëm Fier e ka dënuar Kapllanajn me 14 vite burg për veprat penale “Vrasje me dashje”, “Vrasje me dashje”, mbetur në tentativë, si dhe “Mbajtja pa leje dhe prodhimi i armëve, armëve luftarake dhe i municionit”.
Atij i kanë mbetur edhe 6 vite për të vuajtur nga dënimi.
Ngjarja për të cilën u dënua daton në vitin 1999. Sipas policisë, gjatë një konflikti për motive të ndryshme, 58-vjeçari ka qëlluar disa herë me armë zjarri ndaj tre shtetasve.
Si pasojë e të shtënave humbi jetën shtetasi me inicialet A. F., ndërsa dy familjarë të tij mbetën të plagosur.
Autoritetet shqiptare dhe ato greke po ndjekin procedurat për ekstradimin e Albert Kapllanajt në Shqipëri, ku ai do të vuajë pjesën e mbetur të dënimit.
Discussion about this post