Kanë përfunduar dy ndeshjet e sotme të javës së parë të Abissnet Superiores, me Partizanin dhe Teutën që u ndanë në paqe, ndërsa Laçi dhe Elbasani dhuruan një përballje me emocione deri në fund.
Në “Arenën e Demave”, Partizani dhe Teuta barazuan pa gola, në një sfidë ku nuk munguan episodet e forta.
Në minutën e 25-të, një kontakt në zonë mes sulmuesit të Partizanit, Seku Sidibe, dhe mesfushorit të Teutës, Ergis Arifi, u konsiderua faull dhe arbitri akordoi penallti për skuadrën durrsake. Nga pika e bardhë u paraqit Sherif Kallaku, por goditja e tij u ndal nga shtylla.
Situata u bë edhe më e vështirë për Partizanin në fundin e pjesës së parë. Roian Human u ndëshkua me karton të kuq pasi goditi me grusht Kallakun gjatë një dueli mes tyre. Të kuqtë mbetën kështu me 10 lojtarë, ndërsa 45 minutat e para u mbyllën 0-0.
Edhe pse Teuta luajti me një lojtar më shumë gjatë gjithë pjesës së dytë, durrsakët nuk arritën ta shfrytëzonin avantazhin numerik. Partizani rezistoi dhe në fund të 90 minutave rezultati mbeti i pandryshuar, 0-0.
Në Kurbin, Laçi dhe Elbasani u ndanë në barazim 1-1, në një ndeshje që u vendos në pjesën e dytë.
Laçi gjeti rrugën e rrjetës që në minutën e 9-të me Sandër Kalajn, por goli u anulua për pozicion jashtë loje pas ndërhyrjes së VAR-it. Arbitri rishikoi pamjet në ekran dhe vendosi të mos e quante të vlefshëm golin.
Pjesa e parë u mbyll pa gola, ndërsa spektakli nisi pas pushimit. Në minutën e 56-të, Rubin Hebaj kaloi Elbasanin në avantazh. Sulmuesi shkodran u tregua i saktë nga pika e bardhë, pas një faulli të shkaktuar brenda zonës.
Kur gjithçka po shkonte drejt fitores së miqve, Laçi reagoi në minutën e 84-t. Orgis Cena, i aktivizuar si zëvendësues në pjesën e dytë, realizoi një supergol nga distanca dhe riktheu baraspeshën.
Në fund, Laçi dhe Elbasani u ndanë në shifrat 1-1, duke marrë nga një pikë në startin e kampionatit.
Discussion about this post