Ekzekutohet me armë gjahu kreu i Camorra-s në Napoli, u gjet i vrarë në makinën e tij

Raffaele Afeltra, i lidhur prej vitesh me fraksionin Afeltra-Di Martino, u qëllua disa herë në një pritë në zonën e maleve Lattari. Hetuesit po shqyrtojnë edhe mundësinë e rikthimit të përplasjeve mes klaneve.

Një vrasje e bujshme ka tronditur zonën e Napolit, në Itali, duke rikthyer në vëmendje hijen e konflikteve mes klaneve të Camorra-s.

Raffaele Afeltra, 69 vjeç, i konsideruar prej kohësh si një prej drejtuesve të Camorra-s dhe i lidhur me fraksionin Afeltra-Di Martino në Pimonte, u gjet i vrarë në makinën e tij.

Sipas rindërtimeve të para të hetuesve, Afeltra ishte viktimë e një prerjeje të organizuar, ku autorët e panjohur iu afruan dhe hapën zjarr ndaj tij me armë gjahu të kalibrit 12.

Sulmi ishte i pamëshirshëm dhe 69-vjeçari nuk pati mundësi të shpëtonte.

Trupi i Afeltrës u gjet pranë një parcele toke në zonën e maleve Lattari, në një pronë që lidhej me të.

Në vendngjarje ndërhynë karabinierët e kompanisë së Castellammare di Stabia dhe Njësia Hetimore e Torre Annunziata, të cilët kanë nisur hetimet për zbardhjen e plotë të rrethanave të vrasjes.

Deri tani nuk ka një autor të identifikuar dhe hetuesit po përpiqen të përcaktojnë edhe motivin e saktë të ekzekutimit.

Një nga pistat që po shqyrtohet lidhet me të kaluarën kriminale të viktimës dhe konfliktet mes grupeve rivale, duke ngritur dyshime se përplasjet e vjetra klanore mund të jenë rikthyer.

Afeltra, i njohur në botën kriminale me nofkën “O’ burraccione”, kishte një të kaluar të gjatë të lidhur me Camorra-n.

Në vitin 2019, ai iu dorëzua autoriteteve pas një periudhe të shkurtër arratie. Më pas vuajti një dënim përfundimtar për zhvatje në kuadër të veprimtarisë së Camorra-s.

Megjithatë, prej rreth tre vitesh ai ndodhej jashtë burgut.

Tashmë hetuesit po analizojnë lëvizjet e tij të fundit, lidhjet me grupet kriminale dhe konfliktet e mundshme që mund të kenë çuar në vrasjen e tij.

Për autoritetet italiane, ekzekutimi mund të jetë një sinjal i rëndësishëm për situatën kriminale në zonën e Pimonte dhe në territorin e kontrolluar historikisht nga grupet e Camorra-s.