Duke filluar nga sot në supermarketet greke, mbi 1.660 produkte do të jenë në dispozicion me çmime më të ulëta, ndërsa pritet që numri i tyre të shkojë mbi 1.700.
Qeveria dhe bizneset vendase kanë nënshkruar një marrëveshje për të ulur çmimet, me synimin për të ndihmuar familjet që përballen me kosto të larta të jetesës. Kjo listë përfshin artikuj ushqimorë si mielli, qumështi, mishi, si dhe produkte të tjera si detergjentë, shampo, pelena për fëmijë dhe mjetet shkollore.
Ulja mesatare e çmimeve pritet të jetë rreth 7%, në varësi të artikullit dhe do të vazhdojë për një periudhë prej dy deri në katër muaj. Disa produkte, veçanërisht mjetet shkollore, do të kenë një ulje më të madhe dhe tek disa të tjera mund të shkojë deri në 35%.
Produktet që përfshihen në këtë program do të shënohen me një shenjë të veçantë në supermarket, dhe konsumatorët mund t’i identifikojnë ato edhe në platformën online “PosoKanei”- “SaKushton”. Megjithatë, organizatat e konsumatorëve bëjnë të ditur se ulja e çmimeve nuk do të prekë automatikisht të gjitha produktet në një kategori, por vetëm disa produkte specifike që janë përfshirë në marrëveshje.
Në të njëjtën kohë, qeveria është në fazën përgatitore për të vazhduar subvencionimin e karburanteve. Një vendim pritet të merret në lidhje me vazhdimin e subvencionit prej 10 cent për litër për naftën, ndërkohë që çmimet e karburanteve mbeten mbi dy euro për litër.
Këto masa qeveritare vijnë disa ditë para Panairit Ndërkombëtar të Selanikut, ku pritet që kryeministri Mitsotakis të prezantojë një paketë ekonomike të re për të ndihmuar të ardhurat dhe familjet greke e cila thuhet se mund të shkojë deri në 1.7 mld euro.
Nga ana e tyre partitë opozitare që po përgatiten për zgjedhjet parlamentare që do të zhvillohen ne muajt e ardhshëm vazhdojnë kritikat ndaj qeverisë për politikat e saj sidomos në përballimin e shtrenjtësisë në artikujt ushqimorë, karburante, energjinë elektrike apo qiratë e shtëpive.
Por e kundërta ndodh në Shqiperi.
Rënia e fortë e euros këtë verë do të duhej të ndihmonte në uljen e çmimeve të produkteve të importuara, por siç tregojnë të dhënat e Eurostat çmimet e ushqimeve dhe pijeve joalkoolike në Shqipëri u rritën me 3.2% në korrik 2026, krahasuar me të njëjtin muaj të një viti më parë ose pesë herë më shumë se në Bashkimin Europian ku shtrenjtimi ishte vetëm 0.6%.
Të dhënat e Eurostat-it tregojnë se presionet mbi çmimet e ushqimeve po lëvizin në kahe të kundërta. Në Shqipëri, norma vjetore u përshpejtua nga 2.9% në qershor në 3.2% në korrik, ndërsa në BE u ngadalësua nga 1% në qershor në 0.6 % në Korrik.
Nga renditja e Eurostat-it rezulton se Shqipëria ishte e pesta me normën më të lartë të inflacionit të ushqimeve mes 36 vendeve europiane. Norma më të larta u regjistruan vetëm në Turqi, me 37.6%, Rumani, me 4.6%, Qipro, me 4.5%, dhe Islandë, me 4.4%.
Discussion about this post