Një protestuese e pranishme në lëvizjen studentore te Ministria e Arsimit, ka tërhequr vëmendjen me mesazhin e përcjellë përmes veshjes së saj.
Në një prononcim, ajo tregoi se mbante veshur një bluzë me fotografinë e Musine Kokalarit, duke shprehur shpresën se idetë e saj për demokracinë dhe drejtësinë mund të jetësohen.
“Musine Kokalari është heroina. Ajo ishte një nga personat që besonte në demokraci, në drejtësi, për një Shqipëri më të mirë. Shpresoj që me ndryshimet që mund të vijnë pas kësaj proteste, ndoshta idetë e saj mund të jetësohen”, u shpreh protestuesja.
Ajo tregoi gjithashtu se jeton mes Shqipërisë dhe Anglisë dhe se ka punuar në sistemin e drejtësisë në të dy vendet. Duke iu referuar sjelljes së policisë gjatë protestave, ajo tha se dhuna ndaj qytetarëve është fatkeqësi e këtij kombi.
“Policia nuk të vjen dhe të puth në faqe, por ka disa rregulla. Policia këtu i rreh para se t’i arrestojë, i rreh dhe atje. Kjo është fatkeqësi e këtij kombi. Ky vend nuk është se i mungon talenti, por ka nevojë për njerëz që e duan Shqipërinë”, deklaroi ajo.
Discussion about this post