Një avion privat me nëntë persona në bord është rrëzuar pasditen e së dielës në një zonë të banuar në Palm Beach County, Florida, duke vënë në lëvizje autoritetet amerikane.
Lajmi është konfirmuar nga Administrata Federale e Aviacionit (FAA), e cila bëri të ditur se avioni ishte një Learjet 60, që udhëtonte nga aeroporti ndërkombëtar Austin-Bergstrom drejt Bahamas.
Sipas autoriteteve lokale, avioni u rrëzua pranë Military Trail, në zonën mes Cresthaven Boulevard dhe 10th Avenue North.
Të dhënat e gjurmimit të fluturimit nga faqja ADS-B Exchange tregojnë se avioni kishte humbur rreth 27 mijë këmbë lartësi brenda vetëm një minute, pak përpara se sinjali i gjurmimit të ndërpritej.
Për zbardhjen e rrethanave të aksidentit kanë nisur hetimet nga FAA dhe Bordi Kombëtar i Sigurisë së Transportit (NTSB).
Ndërkohë, autoritetet kanë bllokuar të dyja drejtimet e qarkullimit në Military Trail deri në një njoftim të dytë, duke u bërë thirrje drejtuesve të automjeteve të shmangin zonën dhe të përdorin rrugë alternative.
Sipas raportimit të CNN, vendi i rrëzimit ndodhet rreth katër milje në jug të aeroportit të West Palm Beach.
Ngjarja ndodhi pak më shumë se një orë pasi presidenti amerikan Donald Trump ishte larguar nga aeroporti me avionin presidencial Air Force One.
Deri në momentin e raportimit, nuk janë bërë të ditura detaje të konfirmuara mbi fatin e nëntë personave që ndodheshin në bord apo mbi shkaqet e rrëzimit.
Hetimet vijojnë për të përcaktuar rrethanat e aksidentit.
Discussion about this post