Ditën e sotme është finalizuar një tjetër operacion policor i koduar “Poker 2022”, për goditjen e veprimtarisë kriminale në fushën e lojërave të fatit.
Nga burimet e policisë bëhet me dije se dy të rinjtë me iniciale, E. Zh., 30 vjeç dhe M. M., 26 vjeç, të dy banues në Berat ushtronin aktivitetin e paligjshëm të lojërave të fatit dhe posedonin lëndë narkotike.
Specialistët e Seksionit për Krimet në Komisariatin e Policisë Berat, në bashkëpunim me Seksionin për Hetimin e Narkotikëve në DVP Berat, në vijim të punës për parandalimin dhe goditjen e veprimtarisë kriminale në fushën e organizimit të lojërave të fatit, bazuar dhe në informacionet e marra në rrugë operative se dy të rinj ushtronin këtë aktivitet kriminal në qytetin e Beratit, organizuan dhe finalizuan operacionin policor të koduar “Poker 2022”.
Në kuadër të operacionit 2 shtetasit u arrestuan në flagrancë në ambientet e një lokali për veprat penale “Organizimi i lotarive të palejuara”, “Vënia në dispozicion e lokaleve për lojëra të palejuara” dhe “Prodhimi dhe shitja e narkotikëve”.
Gjatë kontrollit të ushtruar në lagjen “Uznovë”, në lokalin në pronësi të shtetasit E. Zh., u gjetën dhe u sekuestruan 415 gramë lëndë narkotike cannabis sativa, çipsa dhe një tavolinë pokeri që përdorej për organizimin e lojërave të fatit.
Nga ana tjetër, janë proceduar penalisht për veprën penale “Organizimi i lotarive të palejuara” shtetasit: K. D., 25 vjeç, A. Gj., 43 vjeç, A. H., 21 vjeç, N. M., 20 vjeç, T. P., 36 vjeç, G. K., 36 vjeç, A. M., 31 vjeç, F. K., 25 vjeç, P. L., 25 vjeç dhe R. M., 26 vjeç, klientë në lokalin e shtetasit E. Zh.
Së fundmi, materialet i kaluan Prokurorisë pranë Gjykatës së Shkallës së Parë Berat, për veprime të mëtejshme procedurale.
Discussion about this post