Vehap Kola-30 vite studime e kërkime arkivash dhe tani e tutje, pas miratimit të ligjit për hapjen e dosjeve të Sigurimit të Shtetit, është krejt e mundur që të krijohet një databazë online e krimeve të komunizmit.
Arsyeja është e thjeshtë: nëse deri tani kemi arritur të informohemi vetëm me copëza të palidhura për përndjekjen dhe vuajtjet e shqiptarëve në 45 vite diktaturë, tani është momenti që ato copëza të lidhen në një histori të plotë dhe kohezive.
Në këtë mënyrë, shqiptarët mund të kuptojnë më thellë tragjeditë dhe dramat personale të secilit të përndjekur dhe t’i vendosin lehtësisht në mozaikun e plotë të historisë së përgjakshme të komunizmit mes shqiptarëve.
Kjo databazë është sot edhe më e domosdoshme pasi hapja e dosjeve të bashkëpunëtorëve të Sigurimit të Shtetit rrezikon të shtrembërojë pikërisht historinë që synon të zbardhë, duke thënë të vërtetën e pjesshme: pjesën e nënshtrimit dhe bashkëpunimit të shqiptarëve të thjeshtë me një organizatë okulte dhe terroriste siç ishte Sugurimi i Shtetit komunist.
Historia e vërtetë e përndjekjes së çdo shqiptari dhe të gjithë shqiotarëve për 45 vite nuk nis as nuk mbaron me raportimet e bashkëpunëtorëve. Ajo nis me qëllimin që kishte Sigurimi i Shtetit si shqisa terroriste e Partisë së Punës dhe Byrosë Politike për të shtypur kundërshtitë ndaj komunizmit dhe për të dekurajuar çdo mendim kritik e çdo rezistencë ndaj regjimit.
Historia vazhdon me rekrutimin, shpesh nën terror, të bashkëpunëtorëve dhe fabrikimin e akuzave, me torturat në hetuesitë politike që synonin të përkulnin dhe detyronin shqiptarët të nënshkruanin dëshmi të stisura kundër vetes.
Pretencat e prokurorisë, dëshmitë në gjyqe (kur bëheshin), mbrojtja dhe vendimet e gjykatave, të gjitha mund ta plotësojnë historinë dhe kronologjinë e vuajtjeve. Sendet e ruajtura të të dënuarve, shkrimet dhe veprat e tyre do ta zgjerojnë njohjen e shqiptarit të shekullit të 21-të për odisenë e secilit të dënuar politik në komunizëm.
Teknikisht kjo është një punë e mundur. Efekti i saj politik është madhor. Në fabulën e vuajtjeve nga sistemi totalitar i komunizmit enverist, kush bënte çfarë është shumë e rëndësishme sot që ne do të njohim vetëm një pjesë të asaj fabule: atë të bashkëpunëtorëve të terrorizmit komunist.
Që kriminelët dhe persekutorët e shqiptarëve të mos mbeten të panjohur dhe barra morale të mos bjerë vetëm mbi bashkëpunëtorët, një projekt i tillë është i domosdoshëm.
Discussion about this post