Dy ditë pasi u mblodh me kabinetin e ministrave, kreu i qeverisë është takuar sot me Presidentin Bajram Begaj dhe më pas zhvilloi një takim me drejtuesit politike të qarqeve në prag të zgjedhjeve të 14 majit.
Mesa duket kryeministri ka “përveshur” mëngët për të përcaktuar nëse vartësit e tij që drejtojnë aktualisht bashkitë janë të denjë për të qëndruar krah kreut të qeverisë në mandatin e tretë.
Mësohet se takimi me drejtuesit e qarqeve ka nisur rreth orës 13:00 të mesditës së sotme në vilën 31 në zonën e ish-Bllokut në Tiranë ku drejtuesit e qarqeve po spiunojnë për udhëheqësit aktualë vendorë.
Kështu Rama po krijon një Bord Transparence për kryetarët e Bashkisë, një tentativë që mund t’i rezervojë vetëm dështim nisur nga e njëjta qasje me Bordin e Transparencës për karburantet që ngjalli polemika për shkak të abuzimeve me çmimet.
Por Rama nuk di të bëjë ndryshe, duke qenë se një nga karakteristikat e pushteti të tij ka qenë dhe lufta brenda llojit, dhe ky “Bord transparence” me drejtuesit e qarqeve do t’i sigurojë gjithçka tjetër veç jo transparencë. Nëse takimi do të ishte kaq transparent, duhet të ishte zhvilluar në praninë e kamerave siç Erion Veliaj bën edhe për veprimet më banale, kur shpërndan një tas supë.
Ndryshe nga demokratët të cilët kanë përcaktuar me anë të Primareve se kush do të garojë përballë socialistëve në zgjedhjet e 14 majit, këta të fundit nuk kanë ende asnjë emër kandidati zyrtar pasi kryeministri pret raportin e “spiunëve” të qarqeve për të vendosur fatin e kryebashkiakëve.
Këtë herë Rama e di që beteja për lokalet nuk do të jetë e lehtë pasi opozita do të hyjë në zgjedhje dhe Berisha e Meta kanë premtuar fushatë intensive në çdo qark.
Discussion about this post