Gjykata e Lartë ka marrë në shqyrtim kërkesën e SPAK për rikthimin në burg të mjekut Edvin Prifti.
Seanca e këshillimit ka nisur në orën 12:00, ndërsa mësohet se kërkesa do të shqyrtohet nga Sandër Simoni, Klodian Kurushi dhe Albana Boksi.
Prifti u vendos nën akuzën e SPAK më 11 shkurt, si pjesë e një hetimi të nisur ndaj 12 personave të tjerë që dyshohej se synonin të lironin disa të burgosur në burgun e Fushë-Krujës kundrejt përfitimeve monetare.
Ai vetë u akuzua se kishte marrë ryshfet për operimin e nënës së njërës prej sekretareve të gjykatës së Krujës, që ishin asokohe nën përgjim.
Mjeku Edvin Prifti dyshohet për kryerjen e dy veprave penale dhe ndaj tij është vendosur masa e “Pezullimit të ushtrimit të një detyre apo shërbimi publik”.
