Ambasadori i Bashkimit Evropian në Shqipëri, Luigi Soreca, në një intervistë për Albanian Post është shprehur se të shtunën e 15 majit, së bashku me ambasadorin gjerman dhe me sekretarin e përgjithshëm të RYCO, do të firmosin një kontratë prej 5.5 milionë eurosh.
Marrëveshja pritet të nënshkruhet në orën 11:30.
Qëllimi i kontratës do të jetë për shkëmbimin skolastik në Ballkanin Perëndimor.
Kjo, sipas ambasadorit, do t’u japë mundësinë shumë të rinjve shqiptarë të ndajnë eksperiencat me miqtë e tyre në Ballkan.
“Plani i fundit i investimit ekonomik ka parë krijimin e një garancie për rininë. Ky është një asistim financiar, i cili do të lejojë të rinjtë shqiptarë të tranzitojnë nga shkolla drejt tregut të punës. Sigurisht, Erasmus është ndër programet më popullore”, tha Soreca.
Gjithashtu, ai theksoi se janë zgjedhur të rinjtë, sepse ata janë qytetarët e ardhshëm të Shqipërisë dhe të BE-së.
“Biseda me të rinjtë ka qenë prioritet për të që kur ka marrë detyrën në vitin 2018”.
Soreca tha gjithashtu se ka krijuar institucionin e Ambasadorëve Evropian të Rinisë.
“Janë 10 të rinj shumë të ditur dhe shumë të talentuar, të cilët na ndjekin ne në punën tonë. Ata flasin me shqiptarët dhe na tregojnë ne se çfarë duan të rinjtë në Shqipëri”, u shpreh ai.
